Ministria e Jashtme bullgare ka reaguar ndaj deklaratës së kryeministrit Edi Rama, i cili tha ditën e djeshme në Bruksel, se Bullgaria po mban peng Shqipërinë dhe Maqedoninë e Veriut, në lidhje me mos hapjen e negociatave me Bashkimin Evropian.
Përmes një deklarate, ministria shprehet se Bullgaria ka mbështetur identitetin evropian të Shqipërisë dhe rrugën e saj drejt integrimit dhe e konsideron fyese deklaratën e Ramës, për të cilën thotë se është e përsëritur.
Sipas ministrisë, gjuha e përdorur nga kreu i qeverisë shqiptare, nuk mund të justifikohet, teksa shton se Rama duhet të flasë si një politikan i një vendi kandidat për në BE.
Ndër të tjera, në deklaratë thuhet se është e papranueshme që marrëdhëniet mes vendeve të mbahen peng i ekscentricitetit të kryeministrit aktual shqiptar.
Ndërkohë, nuk ka vonuar edhe reagimi i Ramës, i cili ka ironizuar deklaratën e ministrisë bullgare, duke theksuar se e sheh si problem mënyrën se si Bullgaria dëshiron të zgjidhë çështjet bilaterale.
Sipas Ramës, Bullgaria duhet të heqë veton, në të kundërt duhet të durojë deklaratat e tij.
“Oh! Ministria e Jashtme e Bullgarisë ka një problem me mënyrën time të të folurit! Mjaft e drejtë. Edhe unë kam një problem me mënyrën sesi Bullgaria dëshiron të zgjidhë çështjet biletarale duke përdorur procesin e zgjerimit si mjet për rrëmbimin e dy vendeve të NATO-s! Miq: Hiqni VETO-n ose jini të durueshëm me mua!”, shkruan Rama në Twitter.
Oh! Bulgaria’s Foreign Ministry has an issue with my way of speaking!Fair enough.I have an issue too with the way Bulgaria wants to solve biletaral issues by using the enlargement process as e vehicle of kidnapping two NATO countries! Easy friends:Lift the VETO or bear with me!
— Edi Rama (@ediramaal) June 24, 2022
