Dhjetëra efektivë të policisë “Shqiponja”, të shoqëruar dhe nga oficerë të Krimeve të Rënda të drejtorisë së Fierit, kanë kryer kontrollin e rreth 80 banesave në qytetin e Fierit, ku besohet se kanë qëndruar me qira personat që kanë ekzekutuar me armë zjarri, biznesmenin Demir Backa.
Një kontroll i tillë është kryer pikërisht në vendin e quajtur “15 katëshi” në Fier, zonë e cila kontrollohet nga Arben Isufi, një personazh me precedentë penalë dhe potencialisht me shumë influencë në këtë qytet.
Policia dyshon se mjeti dhe autorët kanë qendruar në Fier, duke u strehuar disa ditë para kryerjes së krimit në një nga zonat e këtij qyteti. Qëndrimi i tyre në Fier lidhet me faktin e mbledhjes të informacionit për viktimën dhe vendin se ku do të qëllohej.
Si ndodhi vrasja?
Biznesmeni fierak Demir Backa u ekzekutua mbrëmjen e së dielës me breshëri kallashnikovi. 57- vjeçari ishte duke larguar nga një qendër tregtare në Fier, kur 2 autorë të maskuar kanë qëlluar me breshëri në drejtim të automjetit të tij, kur Backa ishte duke u larguar.
Ngjarja ka shkaktuar panik në zonë, ndërsa 57-vjeçari është transportuar me urgjencë në gjendje të rëndë drejt Spitalit të Fierit. Fatkeqësisht plumbat i kanë prekur organet jetësore, duke e bërë të pamundur mbajtjen në jetë. Ndaj Backës është qëlluar me 16 plumba nga një distancë 7-8 metra nga 2 armë të ndryshme.
Autorët pasi kanë realizuar atentatin janë larguar nga vendi i ngjarjes me një automjet ‘Benz C Klas’.
Pak çaste më pas policia ka arritur të gjej mjetin duke u djegur në fshatin Daullas. Makina nuk është djegur plotësisht, ndërsa brenda makinës janë gjetur edhe 2 armë zjarri, një kallashnikov dhe një pistoletë, që u përdorën nga autorët për kryerjen e vrasjes.
