Pak minuta pasi Lulzim Basha dhe Edi Rama bashkuan votat për miratimin e ndryshimeve Kushtetuese që i zgjasin mandatin komisioneve të Vettingut, ka ardhur reagimi i ambasadores së SHBA në Tiranë, Yuri Kim.
Në një mesazh në Facebook, ambasada e ka cilësuar këtë moment si “një hap të rëndësishëm për të gjithë shqiptarët“.
Ky vendim, sipas SHBA-së, “do të na çojë drejt një sistemi drejtësie më të fortë dhe më të besueshëm duke i hapur rrugë integrimit europian”.
Deklarata
Shtetet e Bashkuara përshëndesin miratimin e zgjatjes së mandatit të vetingut në Parlament. Ky është një hap i rëndësishëm përpara për të gjithë shqiptarët – drejt një sistemi drejtësie më të fortë, më të besueshëm dhe drejt integrimit europian. Shtetet e Bashkuara do ta mbështesin gjithmonë Shqipërinë përgjatë kësaj rrugë të rëndësishme.
Më herët miratimin në Kuvend e kanë përshëndetur dhe ambasadorët e BE-së dhe Gjermanisë. Ata e kanë cilësuar këtë një vendim të rëndësishëm që do t’i hapë rrugë Shqipërisë drejt integrimit në BE.
Parlamenti miratoi me 118 vota pro, 0 kundër dhe 4 abstenim, ndryshimet Kushtetuese për zgjatjen e mandatit të organeve të vetingut.
The amendment to extend vetting needed 94 out of 140 votes. It passed with overwhelming support: 118 for, 0 against, 4 abstentions. 🇦🇱 🇺🇸 🇪🇺👏 https://t.co/9tWTvNWVCf
— Ambassador Yuri Kim (@USAmbAlbania) February 10, 2022