Koreja Veriore ka konfirmuar se ka testuar me sukses të martën një raketë të re balistike, të lëshuar nga një nëndetëse.
Agjencia shtetërore e lajmeve, KCNA, ka thënë se raketa ka pasur “teknologji të avancuar”, çka e bën atë vështirë të gjurmueshme.
Koreja Veriore ka kryer një sërë testesh në javët e fundit, duke lansuar edhe ato që ka thënë se janë armë hipersonike, apo me rreze të gjatë veprimi.
Kombet e Bashkuara ia ndalojnë këtij shteti testimin e raketave balistike dhe armëve bërthamore.
Raketat balistike konsiderohen më kërcënuese, pasi mund të bartin më shumë armë, të kenë rreze më të gjatë veprimi dhe mund të fluturojnë më shpejt.
Media shtetërore verikoreane ka thënë të mërkurën se raketa e fundit ka pasur “teknologji kontrolluese”, që ka mundësuar lëvizjen anash.
Kjo raketë ka qenë një nga armët e reja që është prezantuar në një parakalim në Phenjan javën e kaluar. Raketa ka rënë në Detin Lindor, të njohur edhe si Deti i Japonisë dhe ka udhëtuar rreth 450 kilometra me një lartësi maksimale prej 60 kilometrash.
