Shtëpia e Bardhë ka sinjalizuar se nuk pret shumë nga takimi virtual i së hënës mes Presidentit amerikan Joe Biden dhe atij kinez Xi Jinping. Takimi pritet të përqendrohet në menaxhimin e rregullave të konkurrencës mes dy vendeve rivale, por nuk ka të ngjarë të përfundojë me një zgjidhje të mosmarrëveshjeve.
Takimi virtual mes Presidentit amerikan Joe Biden dhe atij kinez Xi Jinping është planifikuar të mbahet të hënën, një vazhdimësi e telefonatës së tyre në shtator.
Shtëpia e Bardhë tashmë ka sinjalizuar se nuk pret rezultate specifike nga takimi.
“Pjesë e diskutimit do të jetë rëndësia e angazhimit mes dy udhëheqësve. Ne nuk jemi në kërkim të rezultateve specifike sepse takimi ka të bëjë me vendosjen e rregullave të një konkurrence efektive”, tha zëdhënësja e Shtëpisë së Bardhë Jen Psaki.
Shtetet e Bashkuara e shohin Kinën si konkurrentin e saj strategjik, ndërsa Pekini po përpiqet të rrisë ndikimin e tij ushtarak dhe ekonomik në mbarë botën. Megjithatë, në prag të takimit, retorika nga të dyja palët është zbutur.
Në një hap tjetër pozitiv, në konferencën e OKB-së për klimën në Glasgou, Shtetet e Bashkuara dhe Kina, dy emetuesit më të mëdhenj të dioksidit të karbonit në botë, njoftuan papritur se do të punojnë së bashku për të ulur nivelin e emetimit dhe se do të takohen rregullisht për të diskutuar mbi krizën e ndryshimit të klimës.
“Xi Jinping dhe Presidenti Biden duan të arrijnë njëfarë stabiliteti që do të mundësonte bashkëpunimin aty ku është e mundur, konkurrencën dhe madje edhe përplasjet aty ku është e nevojshme. Asgjë nga këto nuk do të ndalojë përpjekjen për të ecur përpara, por mendoj se sjellja do të jetë më pozitive gjatë Lojërave Olimpike Dimërore”, thotë Patrick Cronin nga Instituti Hudson.
Megjithatë, mosmarrëveshjet mbi gjendjen e të drejtave të njeriut në Hong Kong dhe atë të pakicave ujgure ka të ngjarë të mbeten të pazgjidhura, si dhe ato për çështjet e tregtisë, lirisë së lundrimit dhe zgjerimit ushtarak të Pekinit në Detin e Kinës Jugore dhe ngushticën e Tajvanit.
“Mund të presim që Presidenti Biden të thotë se Amerika ende i përmbahet politikës së një Kine të vetme dhe Xi Jinping të thotë se Amerika e ka shkelur atë. Pra, asnjëri udhëheqës nuk i ka ndryshuar qëllimet e tij. Secili duket se po kërkon një formulë, fjalët për të bindur tjetrin, se të gjitha veprimet e tyre përkatëse janë në rregull. Dhe kjo nuk ka gjasa të ndodhë”, thotë Robert Daly nga Qendra Wilson.
Përpara takimit të tyre, të dy udhëheqësit morën pjesë në një takim virtual të premten të forumit të Bashkëpunimit Ekonomik Azi-Paqësor, të organizuar nga Zelanda e Re, ku presidenti kinez Xi paralajmëroi rreth rrezikut të rikthimit të tensioneve të kohës së Luftës së Ftohtë në rajon.
“Ne duhet të jemi largpamës, të ecim përpara dhe të refuzojmë praktikat e diskriminimit dhe përjashtimit të të tjerëve. Përpjekjet për të përcaktuar vija ideologjike ose për të formuar qarqe të vogla mbi baza gjeopolitike, në fund, do të dështojnë”, tha ai.
Presidenti Xi po i referohej përpjekjeve të Shteteve të Bashkuara për të forcuar partneritetet e saj në rajon, duke përfshirë partneritetin “Quad” me Indinë, Japoninë dhe Australinë./VOA
