Më 27 dhjetor, Kina ka regjistruar 162 raste të reja të infektimit me koronavirus, njëherësh shifrën më të lartë përgjatë gjithë vitit.
Autoritetet kanë raportuar 150 raste të infektimit në qytetin Xi’an, i cili ka izoluar 13 milionë banorët e tij javën e kaluar, pas raportimit të disa rasteve.
Sipas rregullave të fundit, njerëzit në Xi’an mund të largohen nga shtëpitë e tyre vetëm në raste të rralla.
Secila familje duhet të zgjedhë një anëtar që mund të kryejë blerjet një herë në dy ditë.
E gjithë popullsia është testuar po ashtu disa herë për këtë virus.
Kina është duke zbatuar masa të ashpra në kuadër të politikës “zero raste me koronavirus”, dhe deri tani ka mbajtur pandeminë nën kontroll.
