Kryeministri Edi Rama e konsideron të turpshme qëndrimin e Bashkimit Europian në lidhje me Bullgarinë, pasi kjo e fundit ende nuk e ka hequr veton ndaj RMV-së, duke mos bërë të mundur edhe hapjen e negociatave me Shqipërinë.
Përmes një postimi në rrjetet sociale, Rama u shpreh pak para fillimit të Samitit të BE-së, se Bullgaria po zvarrit dy vende anëtare të NATO-s nën mbikëqyrjen e vendeve anëtare të unionit.
“Është një ditë e re në Evropë, por jo në Bullgari! Sa turp për Evropën kjo çështje bullgare! Në mes të një lufte shumë të nxehtë në oborrin e pasmë të Evropës, një vend i NATO-s rrëmben dy vende të tjera të NATO-s nën mbikëqyrjen e 26 vendeve të BE-së që qëndrojnë të qetë në një shfaqje të frikshme impotence”, shkruan Rama në Twitter.
It is a new day in Europe but not in Bulgaria! What a disgrace for Europe this Bulgarian affair! In the middle of a very hot war at Europe’s backyard a Nato country kidnapps two other Nato countries under the watch of 26 EU countries that sit still in a scary show of impotence!
— Edi Rama (@ediramaal) June 23, 2022
Liderët e 27 vendeve anëtare të Bashkimit Evropian do të takohen këtë të enjte në Bruksel për të diskutuar për dhënien e statusit të vendit kandidat, Ukrainës, Moldavisë dhe Gjeorgjisë.
Takimi i sotëm midis lidërve, në të cilin do të marrin pjesë edhe ata të Ballkanit Perëndimor do të fillojë në orën 09:30 në ndërtesën e Këshillit të Europës, sipas agjendës së publikuar.
Dita e dytë e samitit do të fokusohet në çështjet e eurozonës, ndërsa do të mbahet edhe një takim i nivelit të lartë për Ballkanin Perëndimor, ku pritet të diskutohet për fillimin e negociatave me Shqipërinë dhe Maqedoninë e Veriut.
Po ashtu, është ngritur edhe çështja e liberalizimit të vizave të Kosovës, pasi prej 4 vitesh është konfirmuar për të dytën herë se vendi ka plotësuar të gjitha kriteret.
