Shtatë vende i janë drejtuar me një letër Bashkimit Evropian duke kërkuar integrimin sa më të shpejtë në union të Ballkanit Perëndimor. Letra që i drejtohet krerëve të institucioneve të unionit, mban firmën e ministrave të Jashtëm të Italisë, Çekisë, Austrisë, Kroacisë, Sllokavisë, Sllovenisë dhe Greqisë.
Greqia duket se ka ndryshuar qëndrim ndaj rrugës evropiane të Shqipërisë, të cilën ka kërcënuar se do ta bllokojë nëse nuk zgjidhet çështje ‘Beleri’. Në letër, thuhet se ka ardhur koha për përparim vendimtar në procesin e zgjerimit të BE-së drejt Ballkanit Perëndimor dhe se “një kohë e qartë dhe e arsyeshme për pranmin e tyre është më urgjente se kurrë”.
Ata theksojnë gjithashtu se mirëpresin edhe planin e ri të rritjes, samit që u mbajt të enjten në Tiranë.
Letra e plotë:
Të nderuar Presidentë/Të nderuar kolegë,
Në konkluzionet e tij të 14-15 dhjetorit 2023, Këshilli Evropian ripohoi angazhimin e tij të plotë dhe të qartë për perspektivën e anëtarësimit në BE të Ballkanit Perëndimor dhe bëri thirrje për përshpejtimin e procesit të anëtarësimit të tyre, duke përfshirë avancimin e integrimit gradual midis Bashkimit Evropian dhe Rajonit.
Kanë kaluar më shumë se dy dekada që kur Këshilli miratoi Deklaratën e Selanikut. Ka ardhur koha për përparim vendimtar në procesin e zgjerimit të BE-së drejt Ballkanit Perëndimor. Një kohë e qartë dhe e arsyeshme për pranimin e tyre është më urgjente se kurrë.
Në këtë kontekst, ne mirëpresim dhe mbështesim Planin e ri të Rritjes të Komisionit Evropian për Ballkanin Perëndimor. Ky plan ofron një mundësi konkrete për ta afruar rajonin me tregun e vetëm të BE-së, për të thelluar integrimin ekonomik rajonal dhe për të përshpejtuar reformat themelore. Nëse zbatohet me sukses, ai do të kontribuojë në nxitjen e konvergjencës socio-ekonomike, duke trajtuar ikjen e trurit nga rajoni, duke sjellë përfitime të prekshme për qytetarët e tij dhe duke mbështetur rrugën e Ballkanit Perëndimor drejt anëtarësimit në BE.
Udhëheqësit e Ballkanit Perëndimor, siç nënvizohet në deklaratën e tyre të përbashkët të datës 22 janar 2024, kanë shprehur mbështetjen e tyre të plotë për objektivat e Planit të Rritjes dhe gatishmërinë e tyre për ta zbatuar atë. Duhet ta shfrytëzojmë këtë mundësi. Ky ishte edhe përfundimi i përbashkët i takimit të Ministrave të Jashtëm të “Miqve të Ballkanit Perëndimor” me partnerët e Ballkanit Perëndimor në Romë më 5 shkurt 2024.
Prandaj, ne bëjmë thirrje për angazhimin tuaj personal për të finalizuar me prioritetin më të lartë negociatat ndërinstitucionale për “Lehtësimin e Rritjes dhe Reformës për Ballkanin Perëndimor” përpara zgjedhjeve të Parlamentit Evropian.
Koha është thelbësore. Çdo vonesë do të dëmtojë besueshmërinë e BE-së dhe do të ketë një ndikim negativ në procesin e integrimit evropian të rajonit.
Sinqerisht,
Antonio Tajani
Zëvendëskryeministër dhe Ministër i
Punëve të Jashtme
dhe Bashkëpunimit Ndërkombëtar të Republikës Italiane
Jan Lipavský
Ministër i Punëve të Jashtme të Republikës Çeke
Alexander Schallenberg Ministër Federal për Evropën dhe
Çështjet ndërkombëtare të Republikës së Austrisë
Gordan Grliq Radman
Ministër i Punëve të Jashtme dhe Evropiane
të Republikës së Kroacisë
Juraj Blanar
Ministër i Ceshtjeve me Jashtë dhe Evropiane i Republikës së Sllovakisë.
George Gerapetritis, Ministër i Punëve të Jashtme të Republikës Greke
Tanja Fajon
Ministër i Çështjeve me Jashtë dhe Evropiane të Republikës së Sllovenisë.
