Aktori i njohur Alec Baldwin mund të dënohet me burg. Është ky mendim i disa ekspertëve ligjorë pasi ai qëlloi aksidentalisht një anëtare të stafit dhe plagosi një tjetër gjatë xhirimeve. Kineastja 42-vjeçare Halyna Hutchins ndërroi jetë të enjten, më 21 tetor, pasi Baldwin qëlloi me armën skenike në xhirimet e filmit Western të shekullit të 19-të, “Rust”. Regjisori i filmit – 48-vjeçari Joel Souza – u plagos gjithashtu në incident.
Të dhënat e gjykatës zbuluan se aktori kishte përshtypjen se arma ishte plotësisht e sigurt dhe në një deklaratë, Baldwin vuri në dukje se ai po “bashkëpunonte plotësisht me policinë”, megjithatë ekspertët që atëherë kanë vlerësuar mundësinë nëse 63-vjeçari do të përballet me burg. Sipas tyre, nuk ka gjasa, por nuk është krejtësisht e pamundur, që aktori të përballet me ndonjë akuzë ligjore, shkruan La Times.
Lektorja e lartë në fakultetin juridik të Harvardit, Nancy Gertner, deklaroi se si “në mënyrë që të ketë akuza penale, do të duhej vërtet të tregohej se ai e vrau me dashje këtë grua, gjë që duket e pamundur për faktet siç i njohim ne”. Megjithatë, Matthew Nash, i cili është një avokat në universitetin e Drejtësisë, deklaroi se një akuzë për vrasje të pavullnetshme mund të jetë një dënim i mundshëm kundër Baldwin.
Akuza do të ishte e mundur nëse do të provohej se aktori ishte këshilluar të mos gjuante me armë, por më pas kishte vazhduar ta bënte këtë. Nash tha se “sipas ligjit të New Mexico” Baldwin mund të shpallej “fajtor për vrasje të pavullnetshme”, që është një vrasje që ndodh pa dashje”. Sipas ligjit, një akt i tillë nuk kërkon që i dyshuari të ketë pasur “qëllim specifik” në vrasjen e personit. Sipas kësaj akuze Baldwin mund të përballej me një dënim maksimal prej 18 muaj burg.
