Kryetari i Grupit Parlamentar i PD-së, Enkelejd Alibeaj deklaroi se bashkimi i demokratëve duhet të bëhet mbi disa vlera, si vota transparente dhe gara reale brenda partisë.
Në një deklaratë për mediat në ambientet e jashtme të Parlamentit, Alibeaj u shpreh se platforma e mbështetur nga 32 deputetë shërben për interesin e demokratëve dhe jo personave që kanë probleme.
“Interesi i demokratëve është bashkimi mbi disa vlera, si vota, anëtarësia e certifikuar, zgjerimi i anëtarësisë, proces votimi i drejtë, transparent, garë reale. Kjo përcakton bashkimin e demokratëve. Grupi Parlamentar, në shumicë dërrmuese ka nxjerrë një platformë bashkimi. Një plaformë bashkimi e cila synon mbi të gjitha jo interesin individual të personave që kanë probleme, por për interesin e demokratëve”, tha ai.
Ndërsa, lidhur me zgjedhjen e presidentit të ri, Alibeaj tha se mazhoranca nuk e ka legjitimitetin për ta zgjedhur e vetme.
