Gjykata e Posaçme ka konfiskuar 3.4 milionë euro që u sekuestruan dy vite më parë në Portin e Durrësit. Kjo shumë parash e cila vinte në mënyrë të jashtëligjshme drejt vendit dyshohet se ishte siguruar nga aktivitet i paligjshëm dhe tani do t’i kalojë shtetit.
Vetëm pak ditë më parë Gjykata e Tiranës dënoi me 1 vit e 6 muaj burg Ervis Vladin për “mosdeklarim të ardhurash në kufi” . Por duke përfituar nga gjykimi i shkurtuar, Vladi përfiton ulje dënimi në 1 vit. Në të njëjtën dosje u dënua edhe Agim Çeka për “armëmbajtje pa leje” me 2 vjet 4 muaj.
Ata dyshohet se ishin porositësit e ngarkesës së sekuestruar, që ishte nisur nga Gjermania, përmes linjës së trageteve Ancona-Bari. Ndërkohë në këtë çështje u përfol edhe emri i kreut të grupit parlamentar të PS-së, Taulant Balla, i cili u akuzua nga opozita si i përfshirë në këtë rast.
