“Shqiponjat” gati për të shkruar sërish historinë. Shqipëria mposht me rezultatin e pastër 2-0 Poloninë dhe prek me njërën këmbë “Gjermani 2024”. Pa u shkelmuar ende topi i parë në “Air Albania” u shënuan disa incidente
Tifozët polakë sulmuan tifozët kuqezi duke hedhur stola, ndërsa mes tyre shihen forcat e policisë që përpiqen të ndajnë tifozëritë. Në fushë ndodhen edhe futbollistët kuqezinj të cilët ndalën stërvitjen. Policia hyri në fushë dhe vendosi kordon të dyfishtë.
Në minutat e para, Shqipëria pati një moment të mirë me Bajramin nga krahu i majtë, duke deportuar mirë dhe duke dhënë një top të rrezikshëm brenda zonës, por askush nuk ndodhej aty pranë.
Mrekullia ndodhi në minutën e 37 të ndeshjes. Asani mori topin në këmbët e tij magjike në krahun e djathtë të fushës, dhe nga një diagonale tepër e largët, goditi në mënyrë potenciale dhe e dërgoi në rrjetë duke bërë stadiumin “Air Albania” të çmendej pas atij goli tmerrsisht të bukur.
Një gol që do të mbahet mend gjatë në memoriet e çdo futbolldashësi në mbarë botën, dhe padyshim që do të cilësohet si më i bukuri i të gjithë fazës së eliminatoreve të “EURO 2024”.
Skuadra e drejtuar nga Silvinjo gjeti golin e qetësisë në minutën e 62. Mirlind Daku i sapofutur në fushën e lojës realizoi pas një aksioni nga e djathta e sulmit kuqezi. Kjo ishte ndeshja e tij e dytë me kombëtaren shqiptare dhe goli i parë që padyshim nuk do ta harrojë kurrë këtë moment në këtë ndeshje tepër të rëndësishme për skuadrën tonë.
Polakët u shfaqën të rrezikshëm që në minutën e 8. Zielinski lëshoi një gjuajtje drejt portës kuqezi, por gjeti të vëmendshëm Strakoshën. Në minutën e 21, Polonia kaloi në avantazh. Pas një goditje dënimi, topi shkoi në rrjetë falë devijimit të Kivior. VAR-i anuloi golin pas 3 minutash shqyrtim për pozicion jashtë loje.
Me këtë fitore, Shqipëria ngjitet e vetme në krye të Grupit E me 10 pikë, ndërsa Polonia mban vendin e 4 me 6 pikë. Në ndeshjet e ardhshme që do të luhen më 12 tetor, Shqipëria do të presë në “Air Albania” Çekinë, ndërsa Polonia do të luajë në transfertë përballë Ishujve Faroe.
