Këtë të hënë ka dështuar raundi i parë për zgjedhjen e Presidentit të Republikës. Në seancën plenare nuk u paraqit asnjë kandidaturë, ndaj dhe nuk pati votim.
Deputetja socialiste, Klotida Bushka në emër të Komisionit të Ligjeve tha se deri mëngjesin e sotëm në orën 09:00 nuk u paraqit asnjë kandidaturë, afat ky i përcaktuar më herët nga Konferenca e Kryetarëve.
Ndërsa, kryeparlamentarja Lindita Nikolli e quajti të mbyllur raundin e parë për shkak të mos pasjes së një kandidature për postin e Kreut të Shtetit.
Ajo deklaroi se Konferenca e Kryetarëve duhet të mblidhet sërish për të caktuar një tjetër datë për raundin e dytë.
Deputeti demokrat Edmond Spaho kërkoi fjalën por Nikolla e mbylli seancën plenare.
Për të zgjedhur presidentin e ri në tre raundet e para duhen së paku 84 vota, të cilat mazhoranca e Partisë Socialiste nuk i ka.
Pas raundit të tretë, mazhoranca mund ta zgjedhë vetë Kreun e ri të Shtetit, pasi i ka 71 votat e nevojshme.
