“Askush nuk duhet të dyshojë në përkushtimin e sinqertë të Serbisë ndaj politikës së paqes dhe stabilitetit”.
Kështu u shpreh presidenti serb, Aleksandar Vuçiç në një bisedë telefonike me Derek Chollet, këshilltar i Sekretarit Amerikan të Shtetit, Anthony Blinken.
Temë e bisedës telefonike ishte takimi i ardhshëm në Bruksel në kuadër të dialogut Beograd-Prishtinë, me ndërmjetësimin e Bashkimit Evropian, shkruan Euronews Serbia.
Chollet, si përfaqësues i administratës amerikane, insistoi në nevojën e ruajtjes së paqes dhe stabilitetit, të cilat SHBA-të do ta mbështesin.
Vuçiç shtoi se pret që SHBA-ja dhe partnerët perëndimorë të respektojnë përpjekjet e Serbisë dhe të inkurajojnë Kosovën që t’i qaset dialogut dhe detyrimeve që dalin nga dialogu me seriozitet dhe përgjegjësi.
Sekretari i Përgjithshëm i NATO-s, Jens Stoltenberg do të mbajë takime të ndara në Bruksel këtë të mërkurë me kryeministrin e Kosovës, Albin Kurti dhe presidentin e Serbisë, Aleksandar Vuçiç.
