Kryetari i Bashkimit Demokratik për Integrim (BDI), Ali Ahmeti deklaroi se mërgata shqiptare ka një rol të pazëvendësueshëm.
Gjatë fjalës së tij në Samitin e Tretë të Diasporës, Ahmeti u shpreh se shqiptarët i fituan luftërat e tyre, politikisht, ushtarakisht, por edhe diplomatikisht.
Megjithatë, sipas Ahmetit, sot ka një luftë të re e më të fortë, dhe ajo është që ta bëjmë të begatë atdheun.
“Unë jam dhe kam qenë mërgimtar. Ne na kanë shërnbyer dy porosi të rilindasve kombëtare, Jeronim de Radës, gjaku i Arbrit po rrjedh dhe po shikohet që porosia e Jeronim de Radës është gjallë, sepse në këtë sallë janë arbëreshët, mërgimtarët shqiptarë. Porosia e dytë është e Asdrenit, që i ligjëroi me aq përkushtim Kosovës. Sot Kosova është shtet, shqiptarët në Republikën e Maqedonisë së Verit, janë shtetformues në të gjitha vlerat që i takojnë një kombi, me gjuhë, flamur, simbole.
Shqiptarët në Mal të Zi, nuk e kishin ëndërruar se do të kishin një kryeministër shqiptar, Dritan Abazoviçin. Prandaj, e pazëvendësueshme ka qenë mërgata shqiptare, historikisht, që nga Bukureshti, Stambolli, Egjipti dhe më në fund, por e lartë me gjak, ajo e Evropës, që kulmoi me UÇK. Luftërat i fituam, edhe politkisht, edhe ushtarakisht, edhe diplomatikisht. Sot kemi një luftë të re dhe më të fortë, të bëjmë të begatë atdheun tonë, të organizohemi më shumë, mërgata e ka këtë mundësi.
Sot, me dituri e mençuri, vendet tona mund t’i kemi shumë shpejt në BE. Ashtru siç jemi në NATO, nesër do të jemi në BE. Evropa nuk mund të jetë e qetë pa Shqipërinë, Kosovën, Maqedoninë e Veriut dhe Malin e Zi, Nuk mund të ketë paqe në Ballkanin Perëndimor pa këto shtete. Me përkushtim duhet të punojmë, asgjë e parealizueshme nuk mund të jetë. Të rrojë populli shqiptar”, theksoi ai.
