Dy ditë para mbledhjes së përbashkët mes dy qeverive, qeveria shqiptare miraton një nga marrëveshjet që do të nënshkruhet të premten në Elbasan që ka të bëjë me lejet e qëndrimit të shtetasve respektivë.
Nga shkallët e kryeministrisë ministri i Brendshëm Bledi Çuçi deklaroi se përmes këtij vendimi shtetasit e Kosovës me një aplikim të thjeshtë do të mund të marrin lejen e qëndrimit për 5 vite në Shqipëri dhe brenda lejes së qëndrimit do të jetë edhe leja e punës.
Ndërkohë edhe shqiptarët që jetojnë e punojnë në Kosovë do të marrin leje qëndrimi në Kosovë me procedura të lehtësuara.
I pyetur për marrëveshjen e firmosur me palën britanike për sa i përket emigrantëve, se a do jetë Shqipëria një vend transit për emigrantët e vendeve të treta dhe a do krijohet një kamp refugjatësh, Çuçi tha se është thënë qartë se nuk do ketë kampe refugjatësh për interesa të vendeve të tjera në Shqipëri.