Policia belge ka arrestuar shtetasin Kasandër Noga, pasi dyshohet se është një ndër autorët e plagosjes së Erion Hasanbelliut, ngjarje e ndodhur të dielën në kryeqytetin e Belgjikës, Bruksel.
Arrestimi i tij është kryer në Austri, pas shkëmbimit të informacionit mes policisë shqiptare dhe asaj belge për vendndodhjen e 45-vjeçarit nga Patosi.
Policia belge dyshon se në këtë ngjarje është përfshirë edhe një tjetër person, i cili aktualisht nuk është i identifikuar.
Ndërsa, Policia e Shtetit ka bërë me dije se menjëherë pas ngjarjes, ka ardhur kërkesë për bashkëpunim dhe janë ushtruar disa kontrolle për gjetjen e Nogës, por ka rezultuar se nuk kishte hyrë në Shqipëri.
